Несоодветното депонирање на стаклен отпад може да претствува ризик за заедницата - граѓани реагираат на искршени стакла на тротоар

БИТОЛА - Преку дигиталната алатка за пријавување еколошки проблеми на веб-платформата ekoakcija.online, загрижени граѓани упатија пријава за загрозување на јавниот простор, животната средина и безбедноста на минувачите во битолската населба Карпош. Според наводите во пријавата проследена со фотографии, во непосредна близина на населбата, веднаш до контејнерите наменети за стаклен отпад, бил фрлен и стаклен отпад буквално на самиот коловоз и тротоар, односно надвор од контејнерите за таа намена.

Како што може да се забележи на приложените фотографии, голем дел од одложеното стакло е веќе искршено. Оваа состојба не само што создава грда комунална слика, туку претставува и непосредна закана и ризик од повреди за пешаците, децата што играат во близина и животните, како и опасност од оштетување на автомобилските гуми.

Стаклото не е обичен смет – Има специјализирани контејнери, но одговорноста изостанува

Анализата на овој случај уште еднаш го вади на површина проблемот со неправилното одлагање на специфичните видови отпад. Иако на самата локација се поставени соодветни контејнери наменети токму за собирање стакло, нечија неодговорност довела до тоа амбалажата да биде оставена надвор од нив и расфрлана на отворено.

Од комуналните претпријатија и еколошките организации апелираат до граѓаните за одговорно постапување. Стаклото е материјал што целосно се рециклира, но кога е искршено и расфрлано по улиците, тоа станува опасен отпад што ја отежнува работата на комуналните екипи и создава непотребни ризици за целата заедница.

Потреба од повисока еколошка свест и засилен надзор

Случајот во населбата Карпош покажува дека и покрај поставената комунална инфраструктура за селекција на отпад, во заедницата сè уште отсуствуваат основни навики за одговорно одлагање.

За надминување на ваквите инциденти е неопходна поголема еколошка свест кај поединците, но и поажурен инспекциски надзор и соодветно санкционирање на несовесните граѓани кои го загрозуваат јавниот простор.

Благовремено пријавете еколошки прекршок!

Оваа истражувачка содржина е реализирана во рамките на проектот „Дигитална акција за зелена реакција“. Доколку и во вашата населба забележите несоодветно одложен отпад, оштетена комунална опрема или друг еколошки проблем, искористете ги дигиталните алатки на нашата платформа.

Посетете го модулот РЕАГИРАЈ на веб-платформата ekoakcija.online и придонесете за зачувување на нашата околина.